Депутатлар Татарстанда федераль медицина тернәкләндерү үзәге ачу хакында фикер алышты
07 апрель 2016, 18:04
Бүген Социаль сәясәт комитеты утырышында Татарстанда олылар һәм балалар өчен медицина тернәкләнүе үзәкләрен булдыру хакында сөйләштеләр.
Фикер алышуда ТР сәламәтлек саклау министрының беренче урынбасары Сергей Осипов катнашты. Ул хәбәр иткәнчә, республикада тернәкләндерү хезмәте физик культура ярдәмендә сәламәтләндерүгә каралган 109 кабинетта, физиотерапия бүлекләренең 127 кабинетында, рефлекс терапиясенең 25 кабинетында, психологик терапиянең 19 кабинетында һәм логопедиянең 17 кабинетында күрсәтелә.
Узган ел, мисалга, медицина тернәкләндерү бүлекләрендә 22,3 мең кеше дәваланган, 2014 елда бу сан 12,7 меңне тәшкил иткән.
“Тернәкләнү, авыру яки организмның кайбер функцияләре эшләмәү нәтиҗәсендә, тулысынча сәләмәтләндерү этабы булып тора. Әгәр дә инде бу мөмкин эш түгел икән, ул авыруга социаль һәм физик яктан яраклашырга ярдәм итә. Медицина ягыннан тернәкләндерү инвалидлыкка китерә торган сәбәпләрне юкка чыгарырга, яисә инвалидларга физик, психик, профессиональ һәм икътисади активлыкларын арттырырга булыша”, - дип тәгаенләде министр урынбасары.
Татарстанда инвалидларны тернәкләндерүдә 6, балалар һәм яшүсмерләрне тернәкләндерүдә 13, шулай ук сукыр һәм начар күрүчеләрне тернәкләндерүдә 1 үзәк гамәлдә. Узган ел, мисал өчен, балалар һәм яшүсмерләрне тернәкләндерү үзәгендә 6 мең инвалид балага социаль хезмәт күрсәтелгән.
Сергей Осиповның әйтүенә караганда, бу өлкәдә проблемалар да җитәрлек: “Татарстан Республикасы территориясендә федераль дәрәҗәдәге тернәкләндерү үзәген төзүне кем финансларга тиеш дигән мәсьәлә ачык кала бирә. Шулай ук, социаль иминиятләштерү белән шөгыльләнгән фондларның төбәкләрдәге филиалларының үзара элемтәдә булмавы, медицина тернәкләндерүе буенча финанслауның чикле булуы да чагылыш таба. Төбәк дәрәҗәсенә килгәндә, кыйммәтле медицина җиһазларын сатып алырга финанслар җитми”,- диде ул.
Министрлык вәкиле хәбәр иткәнчә, федераль дәрәҗәдә әлеге үзәкне төзү хакында сүз инде 2012 елда ук барган. Татарстан мондый медицина учреждениесенә мохтаҗ булган 10 төбәк исемлегенә дә кертелгән. Әмма әлеге мәсьәлә проект буенча фикер алышуга гына кайтып калган.
Федераль медицина тернәкләндерү үзәге төзү якынча 1 млрд сум акча таләп итә. Балаларга дигән мондый үзәк төзү исә 550 млн сумга төшәчәк.
"Татар-информ" МА язмасы буенча
Андрей Данилов фотолары
|
