Татарстанда ташламалы салымнардан файдалана ала торган резидентлар мәгълүм булды
28 ноябрь 2016, 10:25
Бүген Татарстан Дәүләт Советының 23 нче утырышы барышында “Оешмаларның милке салымнары хакында”гы закон проекты беренче укылышта һәм тулаем кабул ителде. Әлеге закон нигезендә, алга киткән социаль-икътисадый үсеш территорияләренең резидентларын салымнан азат итү күздә тотыла.
Закон проектын депутатларга тәкъдим иткән бюджет, салымнар һәм финанслар комитеты җитәкчесе Леонид Якунин билгеләп үткәнчә, мондый объектлар моношәһәрләр тирәсендә барлыкка китерелә. Республикада хәзерге вакытта шундый “Чаллы” территориясе бар. Әлеге җирлекләрдә эшмәкәрлек эшчәнлеген алып бару буенча үзенчәлекле хокукый режим булдырылган. Төгәлрәк алганда, резидентлар теркәлү узганнан алып, 10 ел дәвамында салымнардан азат ителә. Бу объектларның оешма балансында 2014 елның 1 гыйнварыннан да алданрак исәпләнмәгән булуы шарт.
"Татар-информ" МА язмасы буенча
Андрей Данилов фотолары
|
