Хафиз Миргалимов«КПРФ – Казан» командасын тәбрикләде
10 июль 2017, 17:10
Бүген Дәүләт Советында узган КПРФ фракциясе утырышында партиянең төбәк бүлекләре командалары арасында мини-футбол буена Бөтенроссия турнирында икенче урынны яулаган “КПРФ-Казан” футбол командасы әгъзаларын бүләкләү булды.
Фракция җитәкчесе Хафиз Миргалимов һәвәскәр команда футболчыларына дипломнар, истәлекле медальләр тапшырып, партия үзәк органнарының сәясәткә һәм сайлау эшенә зур игътибар биреп килүе белән беррәттән, Россия коммунистлары арасында спорт хәрәкәтен дә актив төстә үстерүен билгеләп үтте. “Безнең өчен кешеләрнең сәяси активлыгы да, физик сәламәтлеге дә бик мөһим, – диде КПРФның Татарстандагы төбәк бүлеге җитәкчесе. – Ә инде спорт – сәламәтлек саклауда төп чараларның берсе”.
Дәүләт Советы матбугат хезмәте
|
