Архив эше турында законга үзгәрешләр кертелә
11 июль 2017, 11:14
Татарстан Республикасы Дәүләт Советының утызынчы утырышында “Татарстан Республикасында архив эше турында” закон проекты II һәм III укылышларда каралды.
Татарстан Республикасы Дәүләт Советының Мәгариф, мәдәният, фән һәм милли мәсьәләләр комитеты рәисе Разил Вәлиев белдергәнчә, әлеге закон проектына комитет тәкъдиме буенча архив эше өлкәсендә Татарстан Республикасы Дәүләт Советы вәкаләтләрен билгеләүче статья өстәлгән, калган төзәтмәләрнең барысы да гамәлдәге федераль законнарга туры китерү максатыннан эшләнгән.
“Закон проекты беренче укылышта кабул ителгәннән соң “Россия Федерациясенең аерым закон актларына үзгәртүләр кертү турында” Федераль законы үз көченә кереп, шул исәптән “Россия Федерациясендә архив эше турында” Федераль законы да үзгәртелде” – диде чыгыш ясаучы.
Закон проекты икенче һәм өченче укылышта кабул ителде.
Дәүләт Советы матбугат хезмәте
Андрей Данилов фотолары
|
