Азнакайда Халыклар дусты йортын ачтылар
14 сентябрь 2017, 16:59
Моңа кадәр республикада җиде шундый оешма бар иде. Бу – сигезенчесе, ә ел ахырына кадәр аларның саны тагын да артачак. Азнакайда исә бәйрәм тантанасы белән генә чикләнеп калмыйча Татарстан Халыклары ассамблеясы Советының күчмә утырышын уздырдылар.
“Әлеге Дуслык йортлары республикада яшәүче төрле халыкларга үз йөзләрен саклап калырга ярдәм итә. Бездә барлык милләт вәкилләре бер-берләрен кайгыртып яши. Милләтләр, төрле дин тотучылар арасында аңлашылмаучынлыклар булмаска тиеш. Башка илләрдә ни булганын үзегез күреп торасыз, – дип сөйләде Дәүләт Советы Рәисе, Татарстан Халыклары ассамблеясе советы җитәкчесе Фәрит Мөхәммәтшин. – Без исә әнә шул кешеләргә ярдәм итәбез. Алар Татарстанга чиксез рәхмәтле. Дус яшәү татулыкның нигезе ул».
Читтән килүчеләр ни өчен Татарстанны сайлый? Дәүләт Советы Рәисе моның сәбәбен тотрыклы икьтисадны, республикада яшәүче һәр милләт кешесенә булган тигез мөнәсәбәтне телгә алды. «Күп киләләр. Төрле максат белән йөрүчеләре бар. Районнарда читтән кайткан кешеләр өчен җәмәгать оешмалары булдырырга кирәк. Мигратлар һәрвакыт күз уңында булырга тиеш, – ди Фәрит Мөхәммәтшин. – Читтән килүчеләр арасында оста төзүче, тырыш эшче белән беррәттән дингә, милләткә каршы кешеләр дә булырга мөмкин. Бу өлкәдә эшлисе дә эшлисе әле”.
"Ватаным Татарстан" газетасы язмасы буенча
Андрей Данилов фотолары
|
