Дәүләт Советының яңалыклары
Депутатлар Кәрим Тинчурин исемендәге театрның яңа сезоны ачылышында булдылар
15 сентябрь 2017, 19:11
15 сентябрьдә ТР Дәүләт Советы Рәисе Фәрит Мөхәммәтшин Кәрим Тинчурин исемендәге Татар дәүләт драма һәм комедия театрында булды. Биредә ул Кәрим Тинчуринның бюсты ачылуга багышланган тантанада катнашты һәм “Соңгы пьеса” дигән сппектакль карады.
Бюстны ачуга багышланган тантанада чыгыш ясап Фәрит Мөхәммәтшин Кәрим Тинчуринның татар милли театрын булдыруга һәм үстерүгә керткән өлешен билгеләп үтте. “Без Кәрим Тинчурин кебек шәхесләребез белән хаклы рәвештә горурланабыз, - диде ул. – Аның драматургиясе, әсәрләре буенча куелган спектакльләр халыкның тормышын, кешеләрнең фаҗигале язмышын чагылдыра, аның иҗаты татар театрының алтын фондының зур өлешен тәшкил итә. Үз исемен йөрткән театрда Кәрим Тинчуринның бюсты куеп, без бөек шәхеснең иҗади батырлыгы һәм сынмас көчле рухы алдында баш иябез”.
Бюст янына чәчкләр куйганнан соң Фәрит Мөхәммәтшин, ТР мәдәният министры Айрат Сибгатуллин, парламент депутатлары һәм театр сөючеләр Кәрим Тинчуринның “Утыз өч көн” дигән автобиографик новелласы буенча куелган “Соңгы пьеса” тамашасының премьерасын карадылар.
ТР Дәүләт Советы матбугат хезмәте
|
|
|
