Дәүләт Советының яңалыклары

Вакыйга турында фото

Дәүләт Советының 31 нче утырышында ТР Президенты Рөстәм Миңнеханов Татарстан Дәүләт Советына республиканың эчке һәм тышкы хәле турындагы еллык юллама белән чыкты

Әлеге мәртәбәле җыенга Татарстан Республикасы Дәүләт Киңәшчесе Минтимер Шәймиев, республика Премьер-министры һәм хөкүмәт әгъзалары, Россия Федерациясе Федерация Советы әгъзалары һәм Дәүләт Думасы депутатлары, Татарстанның чит илләрдәге һәм Росссия төбәкләрендәге вәкилләре, республиканың суд органнары, Хисап палатасы җитәкчеләре, республика районнары башлыклары, сәнәгать предприятиеләре җитәкчеләре, иҗтимагый оешмалар вәкилләре, югары уку йортлары җитәкчеләре – барлыгы җиде йөздән артыграк кеше чакырылган.

- Татарстан Республикасы үзенең тотрыклы үсешен дәвам итә, күп кенә социаль-икътисадый күрсәткечләр буенча илдә алдынгылар сафында тора, тормыш өчен һәм бизнес белән шөгыльләнү өчен республикада уңай шартлар тәэмин ителә, - дип башлады үз чыгышын Татарстан Президенты Рөстәм Миңнеханов. - Соңгы дистә еллар эчендә без икътисадта нәтиҗәле базар моделен булдыруга ирештек, лаеклы социаль стандартлар һәм киң сәяси ирек булдыруны тәэмин иттек, кешеләрнең күркәм башлангычларын хуплау һәм аларны тормышка ашыру өчен шартлар тудырдык.

Рөстәм Миңнеханов глобальләшү нәтиҗәсендә килеп чыккан кыенлыкларның кискенләшүе, технологияләрнең һәм кешеләрнең өстенлекле ихтыяҗлары тиз үзгәрү базарларның яңадан бүленешенә һәм иҗтимагый үсешнең яңача корылуына китерә, дип белдерде һәм әлеге үзгәрешләрдә актив катнашырга, алдан күреп эш итәргә, республика мәнфәгатьләрендә һәм гражданнарыбызның тормыш сыйфатын яхшырту өчен эшчәнлегебездә яңа юнәлешләрне файдаланырга чакырды.

http://tatarstan.ru/tat/index.htm/news/1015109.htm

Президент чыгышыннан соң парламент башлыгы Фәрит Мөхәммәтшин Рөстәм Миңнехановка республиканың эчке һәм тышкы хәле турында Татарстанның киләчәктәге үсешенең өстенлекле юнәлешләрен тирән анализлаган чыгышы өчен зур рәхмәт белдерде.

- Иң элек Президент Рөстәм Миңнеханов җитәкчелегендә дәүләт хакимияте һәм җирле үзидарә органнары тарафыннан күпмилләтле Татарстан халкы мәнфәгатен кайгыртып эзлекле эш алып барылуы хакында әйтәсем килә, - диде Фәрит Мөхәммәтшин. «Санкцияләр» белән тыштан басым ясалу шартларында, федераль бюджет ресурслары шактый кыскартылуга да карамастан, республикада социаль-икътисадый, иҗтимгый-сәяси, халыкара вәзгыять уңай. Татарстан халыкара һәм илебез эчендәге элемтәләрне саклый һәм үстерә, халыкара ярышларны лаеклы үткәрергә әзерләнә.

Бу елның 6 ноябрендә 25 еллыгын билгеләп үтәчәк Татарстан Республикасы Конституциясе әлеге сәяси-хокукый фундаментның ышанычлы нигезе булып тора. Төп законыбызга салынган сәяси мөстәкыйльлек элементлары халкыбызның тормыш дәрәҗәсен үстерүгә, социаль-икътисадый үсеш өчен шартлар булдыруга уңышлы хезмәт итә. Рөстәм Нургали улы үз чыгышында искәртеп үткәнчә, Татарстан – Россия Федерациясе субъектлары арасында күп төрле күрсәткечләр буенча лидерлар сафында тора, – дип басым ясады парламент башлыгы.
Татарстанның уңышлары – республика халкының бердәм тырыш хезмәте нәтиҗәсе, диде ул. – Киләчәктә дә лидерлыкны саклап калу өчен икътисадның ныклы, инновацион үсешен тәэмин итү, кеше капиталын, дәүләт һәм муниципаль идарә системасының эффектлыгын үстерү буенча стртегик юнәлешләр буенча барырга кирәк.

Бу максаттан инде ике ел дәвамында закон статусында эшләүче 2030 Стратегиясе һәм барлык хакимият органнары адресына булган күп төрдәге йөкләмәләрдән торган Президент Юлламасы юнәлеш программасы булып тора. Барлык юнәлешләр буенча максатчан эшләү өчен Дәүләт Советы Президиумы Хөкүмәт белән берлектә комплекслы чаралар күрәчәк.

Чараның иҗтимагый әһәмияте исәпкә алынып, Дәүләт Советының утыз беренче утырышыннан туры радио- һәм телетрансляцияләр оештырылды. Интернеттан файдаланучылар республика парламентының рәсми сайтында онлайн-трансляция карый алдылар.

Дәүләт Советы матбугат хезмәте
Андрей Данилов фотолары