Социаль сәясәт буенча комитет утырышында «бюджет» законы проекты каралды
11 октябрь 2017, 17:26
2018 елга Татарстанның сәламәтлек саклау өлкәсенә бюджеттан бүленгән акчалар күләме артачак, дип белдереде Дәүләт Советының Социаль сәясәт комитеты утырышында Татарстан икътисад министры урынбасары Олег Пелевин.
Утырышта депутатлар «2018 елга, 2019 һәм 2020 еллар план чорына Татарстан Республикасы бюджеты турында» Татарстан Республикасы законы проекты хакында фикер алыштылар.
Олег Пелевин әйтүенчә, киләсе елда республиканың сәламәтлек саклау өлкәсенә 22,5 млрд сум акча бүлеп биреләчәк. Бу, 2017 ел белән чагыштырганда, 4,7 млрд сумга күбрәк.
Мәгълүм булганча, депутатлар бюджет планын алдагы 3 елга карый. Шуңа бәйле рәвештә, 2019 елда бу юнәлешкә - 21,4 млрд сум, 2020 елда 19,8 млрд сум күләмендә акча бүлеп бирелер дип фаразлана.
Чит илләрдә яшәүче ватандашларыбызны, ирекле рәвештә Татарстанга күчерү буенча яңа программа эшли башларга мөмкин. Бу хакта бүген депутатларга республиканың хезмәт, халыкны эш белән тәэмин итү һәм социаль яклау министры урынбасары Энҗе Нигъмәтҗанова хәбәр итте.
Аның сүзләренә караганда, бу программа әле быел гына әзерләнә башлаган һәм ул әлегә 2017-2018 елларга исәпләнәчәк.
“Дәүләт программасы чит илләрдә яшәүче 300 ватандашыбызны үз теләкләре белән Татарстанга күчереп кайтарырга ярдәм итәчәк. Боларның 100 се — дәүләт программасында катнашучылар һәм 200е - аларның гаилә әгъзалары”, - диде Энҗе Нигъмәтҗанова.
Урынбасар билгеләп үткәнчә, дәүләт программасы Татарстанга кайтырга теләүчеләргә мәгълүмати һәм норматив-хокукый ярдәм күрсәтүне күздә тота.
Моның өчен каралачак чыгымнар күләме 8 млн 903 мең сум булыр дип планлаштырыла. Моның 4 млн 451 мең сумы 2017 елда тотылачак. Бу акчалар Татарстан бюджетының чыгым өлешендә күрсәтелгән.
Дәүләт программасында катнашырга теләүчеләр эшкә яраклы яшьтә (балигълык яшенә җиткән), хезмәткә яраклы булырга тиеш. Республиканың эш базарында ихтыяҗ булган һөнәр ияләре, бигрәк тә галимнәргә, табибларга, авыл хуҗалыгы хезмәтчәннәренә, югары технологияләр белән шөгыльләнүчеләргә өстенлек биреләчәк.
Дәүләт Советы Рәисе урынбасары Римма Ратникова әлеге программага ихтыяҗ зур булыр дип белдерде. Чит илләрдән Татарстанга кайтырга теләүчеләр шактый, диде ул. “Тиешле шартлар тудырылуга кайтырга теләк белдерүче ватандашлар булачак. Кыргызстанда, Казахстанда сабан туйларда булган вакытта минем янга шактый кеше шул сораулар белән килде, махсус программалар эшләве белән кызыксында” – диде Римма Ратникова һәм әлеге юл белән бу мәсьәләне хәл итеп буласына ышаныч белдерде.
Утырышта башка мәсьәләләр дә каралды. Чараны комитет рәисе Светлана Захарова алып барды.
“Татар-информ” МА язмасы буенча
Андрей Данилов фотолары
| 
