Фәрит МөхәммәтшинТөркиянең Казандагы илчесе Турхан Дильмач әфәндене кабул итте
25 декабрь
2017, 16:31
Бүген Дәүләт Советы Рәисе Фәрит Мөхәммәтшин, республикада дипломатик эшчәнлеге төгәлләнү уңаеннан, Төркия Республикасының Казан шәһәрендәге Генераль илчесе Турхан Дильмач әфәндене кабул итте.
Дәүләт Советы Рәисе соңгы елларда төрле өлкәләрдә, аеруча икътисадта, мәгариф һәм мәдәният өлкәләрендә Татарстан белән Төркия арасындагы элемтәләрнең ныгуын басым ясап әйтте. Әмма, Фәрит Мөхәммәтшин искәртеп узганча, ике республика арасында файдаланылмый калган мөмкинлекләр дә бар әле. Аерым алганда, ул Татарстан белән Төркия арасында парламентара хезмәттәшлекне ныгыту зарурилыгы турында белдерде. Яклар шулай ук республикада якын киләчәктә тормышка ашыру күздә тотылган проектлар буенча фикер алышты.
Очрашу азагында генераль илче “күңелем белән Татарстанда калам”, дип билгеләп үтте. Фәрит Мөхәммәтшин, моңа җавап итеп, Татарстанда яшәүчеләрнең Турхан Дильмач әфәндене күрүгә һәрвакыт шат булуларын басым ясап әйтте һәм аның кыска гына вакыт эчендә татар телен өйрәнүгә ирешүенә соклануын белдерде.
Дәүләт Советы матбугат хезмәте, Андрей Данилов фотолары
|
