Марат Садыйковның ТР Дәүләт Советы депутаты вәкаләтләре туктатылды
20 февраль 2018, 11:49
Бишенче чакырылыш ТР Дәүләт Советының утыз бишенче утырышында Садыйков Марат Наил улының Татарстан Республикасы Дәүләт Советы депутаты вәкаләтләрен вакытыннан алда туктату турында карар кабул ителде.
Бу - Марат Садыйковның күптән түгел Сәламәтлек саклау министры вазифасына билгеләнүе белән бәйле. Парламент рәисе Фәрит Мөхәммәтшин закон чыгару һәм башкарма хакимият органнарында эшне берьюлы алып бару рөхсәт ителмәвен билгеләп узды. “Ул актив депутатларның берсе иде”, - диде Фәрит Мөхәммәтшин һәм Марат Садыйковка эшендә уңышлар теләде.
Искәртеп үтик, Марат Садыйков Казанның 7 нче шәһәр хастаханәсе баш табибы вазифаларын башкарды. 14 февральдә Татарстан Президенты Указы белән, ул Сәламәтлек саклау министры вазифасына билгеләнде.
Дәүләт Советы матбугат хезмәте, Андрей Данилов фотолары
| 
