Фәрит Мөхәммәтшин Ринат Таҗетдиновка Дуслык орденын тапшырды
19 февраль 2018, 21:42
Бүген Татарстанның һәм Россиянең халык артисты Ринат Таҗетдинов "Дуслык ордены" белән бүләкләнде. Татарстан Республикасы Президенты Указы белән бирелгән Дәүләт бүләген Камал театрының данлыклы актерына Татарстан Республикасы Дәүләт Советы Рәисе Фәрит Мөхәммәтшин тапшырды. Ул Татарстан Республикасы Президенты Рөстәм Миңнеханов, Татарстан Республикасының Дәүләт Киңәшчесе Минтимер Шәймиев, Татарстан Дәүләт Советы, Татарстан Республикасы Хөкүмәте исеменнән котлады.
“Бер заман моннан шактый еллар элек Ринат Таҗетдиновның әтисе Арифҗан абый улының кулына бер белдерү тоттыра. Анда “Г.Камал исемендәге татар дәүләт академия театры талантлы яшьләрне Мәскәүгә укырга җибәрә” дип язылган була. Бара Ринат, иҗади имтиханнар бирә. Шулай итеп, 500 кеше арасыннан 23 авыл баласы, конкурстан узып, Щепкин исемендәге уку йортына укырга китә. Без аларның кемнәр икәнен яхшы беләбез, - диде Фәрит Мөхәммәтшин үз чыгышында. - Барысы да мәдәни мирасыбызны баетучылар. Сәхнә йолдызлары, күренекле шәхесләр... Күпме сулар аккан шул көннәрдән соң. Алар инде 80 яшьлек юбилейларын билгеләп үтәләр. Бу – үзе бер бәхет!”
1961 елдан бирле Ринат Таҗетдин Камал театрында хезмәт итә. "Рольләрен бөтен йөрәге аша үткәреп, образларының тормыш-гомерләре белән яши ул. Ил-йортыбыз өчен көрәшкән Идегәйне, Нурихан Фәттахның "Кол Гали"ендә Кол Галине, Туфан Миңнуллинның "Моңлы бер җыр"ында Муса Җәлилне ничек итеп уйный һәм халкыбызга күрсәтә! Туфан Миңнуллинның "Монда тудык, монды үстек" әсәрендә без аны нефтьче, Чыңгыз Айтматовның "Гүзәлем Әсәл"ендә Ильяс, Кәрим Тинчуринның "Сүнгән йолдызлар"ында Мәхдүм, Мансур Гыйлаҗевның "Баскетболист"ында, Зөлфәт Хакимнең "Күрәзәче"сендә уйнаган рольләрең дә шундый. Саный китсәң, бик озак вакыт кирәк булыр иде. Аларның барысы да истә калырлык", - дип юбиляр башкарган рольләрне барлады Татарстан парламенты башлыгы.
Ринат Таҗетдиновка 29 яшендә үк Тукай премиясе бирелә. Ә 2016 елда ул “Алтын битлек” Россия күләмендәге театр премиясенә лаек була.
Фәрит Мөхәммәтшин юбилярның озак еллар Татарстан театр әһелләре берлеген җитәкләве хакында искә алып, Сез театр эчендәге проблемаларны да хәл иттегез, дип белдерде. Дәүләт Советы Рәисе Ринат Таҗетдиновка озак еллар Театр әһелләре берлеге рәисе буларак эшчәнлеге һәм үлемсез образлар тудырган өчен Татарстан Республикасының Дуслык орденын тапшырды.
Дәүләт Советы матбугат хезмәте, Андрей Данилов фотолары
|
