Фәрит Мөхәммәтшин: "Саба районы салым базасын миллиард сумнан арттырды"
21 февраль 2018, 18:31
Бүген көннең беренче яртысында ТР Дәүләт Советы Рәисе Фәрит Мөхәммәтшин Саба районында эш сәфәрендә булды. Ул "Каймак"авыл хуҗалыгы кооперативында булды, Сатыш авылында урнашкан мәдрәсә музеен карады, соңрак Саба районының 2017 елдагы социаль-икътисади үсеше нәтиҗәләренә багышланган сессия эшендә катнашты.
Узган елда Саба районы салым базасын миллиард сумнан арттырып, җитди үстергән. Район Советы утырышында Татарстан Дәүләт Советы Рәисе Фәрит Мөхәммәтшин шулай дип белдерде.
“Сез эшлекле кешеләр белән эшләүнең яңа формаларын табасыз һәм 1 миллиард сумнан арттырып, салым базасын җитди үстергәнсез”,- диде Татарстан парламенты башлыгы. Шулай ук Саба районы үз алдына гомуми үсеш территорияләрен оештыру буенча яңа бурычлар куя, диде ул.
Район үсешенә чистарту корылмалары һәм су әзерләү системаларын җитештерүче "Евро Акцент Саба" предприятиесе җитди өлеш кертә. Фәрит Мөхәммәтшин бу - грунт сулары дәрәҗәсе югары булган районнарда аеруча ихтыяҗ булган продукция, диде.
Татарстан Дәүләт Советы спикеры үз чыгышында Саба районы активын эшсезлек дәрәҗәсен киметергә кирәклегенә юнәлтте. Бүгенгә Саба районы күрсәткечләре республикадагы уртача күрсәткечләрдән арткан. Шулай ук ул медицина учреждениеләренең кадрлар белән тәэмин ителешенә игътибарны юнәлтергә, гражданнарның үзара салым җыю эшен көчәйтергә кирәк, диде. 2017 елда районда 7 миллион сумнан артык акча җыелган, бу 2016 ел белән чагыштырганда шактый кимрәк.
Саба районы башлыгы Рәис Миңнеханов үз чыгышында туучылар саны кимү райондагы төп проблемаларның берсе дип атады. Соңгы биш елда туучылар саны 103 балага кимегән. Район башлыгы авыл җирлекләрендә беренче һәм өченче балалар туган очракта, айлык түләүләр кертелү, бу вазгыятьне үзгәртү мөмкинлеге бирәчәк дип өметләнүен белдерде.
“Туучылар санын арттыру буенча мөслимәләрне, абыстайларны һәм медицина учреждениесе хезмәткәрләрен бала табарга сәләтле хатын-кызлар арасында бала табуны пропагандаларга өндим”, - диде Рәис Миңнеханов.
Район башлыгы Рәис Миңнеханов кече һәм урта бизнес үсеше территориянең икътисади үсү факторы булып тора диде. Бүгенгә районның югары сәнәгать технологияләренең гомуми күләмендә аларның өлеше 33 процент тәшкил итә. “Районны үстерү стратегиясе кысаларында бу күрсәткечне 50 процентка кадәр арттыру бурычын куябыз”, - диде ул.
Район башлыгы Байлар Сабасында яңа мәктәп төзелеше мәсьәләсен дә кузгатты. Хәзерге мәктәптә балалар саны нормадан артып киткән.
Шулай ук авыл туризмын үстерү концепциясен эшләргә кирәклеген дә билгеләп үтте ул.
Рәис Миңнеханов докладында, Россия Президенты тарафыннан бу ел Волонтерлар елы дип аталуын искәртте, районда яшәүчеләр арасында хәрәкәтне үстерү зарурлыгын белдерде.
Дәүләт Советы матбугат хезмәте, Андрей Данилов фотолары
| 
