Фәрит Мөхәммәтшин Мамадышта
26 февраль 2018, 18:31
Бүген Мамадыш районында Дәүләт Советы Рәисе, “Бердәм Россия” партиясенең Татарстандагы төбәк бүлеге Секретаре Фәрит Мөхәммәтшин катнашында “Бердәм Россия” көне булып узды. Парламент башлыгы “Гражданлылык сәгате” проекты кысасында районның яшь гражданнарына паспортлар тапшырды. Ә инде политехника көллияте студентлары легендар “КамАЗ-Мастер” командасы пилотлары белән аралашты.
Проект эше унике мәйданчыкта (сәламәтлек саклау, мәгариф, мәдәният өлкәләренә, авыл җирлекләре, иҗтимагый оешмалар эшенә һ.б. кагылышлы) алып барылды. Көннең беренче яртысында Республика клиник хастаханәсе, ДРКБның “Сәламәтлек үзәге” белгечләре халыкны кабул итү оештырды. Моннан тыш төрле мәйданчыкларда ТР министрлыклары һәм ведомстволары җитәкчелеге катнашында районда сәламәтлек саклау, мәгариф, мәдәният өлкәләрен үстерүгә кагылышлы мәсьәләләр буенча фикер алышу булды.
Көннең икенче яртысында Фәрит Мөхәммәтшин политехника көллияте студентлары белән очрашты. Республика парламенты башлыгы көллиятнең эзтабарлар отряды эше белән кызыксынып танышуы турында сөйләде. Ул паспортлар тапшырып, яшь гражданнарны үзләренең кече ватанына, республика һәм Россия Федерациясенә лаеклы булырга чакырды.
Дәүләт Советы матбугат хезмәте, Андрей Данилов фотолары
|
