Көн кадагында - үсмерләрнең интернет киңлекләрендәге иминлеге мәсьәләсе
27 февраль 2018, 17:12
Бүген Казанның 179 нчы мәктәбендә РФ Федераль Җыены Дәүләт Думасы депутаты, Экология һәм әйләнә-тирә мохитне саклау комитеты рәисе урынбасары, “Бердәм Россия” партиясе тарафдарларының Үзәк координация советы рәистәше Сергей Боярский укытучылар, ата-аналар белән очрашты. Очрашуда катнашучылар балалар һәм үсмерләрнең интернет киңлекләрендәге иминлеге мәсьәләләре буенча фикер алышты.
“Узган елның язында барлык төбәкләрдә балалар һәм үсмерләрне интернеттагы төрле янаулардан саклау темасы буенча фикер алышуны оештырган идек. Озакламый без “Пандора тартмасы”н ачканыбызны аңладык, чөнки ата-аналардан, педагоглар һәм бу темага битараф кала алмаган кешеләрдән бик күп хатлар алдык. Төрле яшьтәге балаларның интернетта утыру тәртибе психологиясен аңлауда гаять зур кимчелекләр бар”, – дип билгеләп үтте С.Боярский. Шул ук вакытта, парламентчы искәрткәнчә, фәкать тискәре ягын гына күрсәтеп, интернетны гаять куркыныч әйбергә әйләндерергә ярамый. Балалар глобаль челтәрдә үзләренең сәләтен үстерү, аралашу, мөстәкыйль белемнәр үзләштерү мөмкинлегенә ия.
|
