Фәрит Мөхәммәтшин яшь парламентарийларны закон чыгару эшендә активрак катнашырга чакырды
15 март 2018, 18:02
Бүген яшь парламентарийлар ТР Дәүләт Советы каршындагы Иҗтимагый яшьләр палатасының 2017 елда башкарган эшләренә йомгак ясадылар. Утырышта Дәүләт Советы Рәисе Фәрит Мөхәммәтшин, республика Премьер-министры урынбасары Васыйл Шәйхразиев, ТР Конституция суды рәисе Фәрхәт Хөснетдинов, РФ Федераль Җыенының югары һәм түбән палатасы депутатлары һәм ТР Дәүләт Советы депуталары да катнашты.
ТР Дәүләт Советы каршындагы Иҗтимагый яшьләр палатасы 14 ел эчендә шактый яшьләрнең сәяси лидерлык мәктәбенә әйләнде. Әлеге яшь парламентчы мәктәбе аша үз максатларына ирешкән атаклы күп кенә сәясәтчеләр үтте, дип белдерде Дәүләт Советы Рәисе Фәрит Мөхәммәтшин үз чыгышында.
Иҗтимагый яшьләр палатасы рәисе Илдар Суфияров әйтүенчә, палатаның барлык эшчәнлеге яшьләрнең хокукларын һәм законлы мәнфәгатьләрен закон нигезендә җайга салу өлкәсендә республика парламенты эшчәнлегенә ярдәм итүгә юнәлдерелгән. 2015 елда ТР Президенты Рөстәм Миңнеханов кушуы буенча 44 муниципаль берәмлектә муниципаль яшьләр парламентлары оештырылган.
Иҗтимагый яшьләр палатасы Россия парламентаризмы көнендә – 27 апрельдә Дәүләт Советының яшь закон чыгаручылары форумы уздыру тәкъдиме белән чыкты. Илдар Суфияров әлеге чараның максаты яшьләрне, актив кешеләрне закон чыгару эше белән кызыксындыруга тарту, дип җиткерде. Оештыручылар форумда 140лап кеше катнашыр дип көтелүен әйтте.
Фәрит Мөхәммәтшин әйтүенчә, илдә яшьләр сәясәтенә зур игътибар күрсәтелә. Россия Президенты Владимир Путин РФ Федераль Җыенына еллык юлламасында яшьләрнең бүгенге заманның гына түгел, киләчәкнең чагылышы икәнлеген билгеләп үтте.
“Безнең яшьләр инде хәзердән үк тормышның күп кенә өлкәләрендә үзләрен күрсәтә. Киләчәк тормышыгызны Татарстан белән бәйләвегезне телибез”, – диде ул.
Фәрит Мөхәммәтшин яшь парламентарийларның эшен активлаштыру буенча берничә кызыклы тәкъдимен дә җиткерде. Әйтик, ул парламент комитетлары каршында оештырылган эксперт советлары составына керергә тәкъдим итте. Бу адым республиканың яшь парламентарийларына закон чыгару өлкәсендә офыкларны киңәйтү буларак та кабул ителде.
Мөмкин кадәр күбрәк кешене закон чыгару эшенә җәлеп итәр өчен, Дәүләт Советы Рәисе яшьләр палатасына республика муниципалитетларында күчмә утырышлар үткәрергә киңәш итте. Моннан тыш, парламент башлыгы яшь парламентарийларга ТР Яшьләр хөкүмәте белән тыгызрак эшләргә чакырды.
Фәрит Мөхәммәтшин республика яшьләрен Россия Президентын сайлауларда сәяси активлык күрсәтергә чакырды. “Һәр тавыш мөһим һәм һәркайсы кирәк!” –диде ул.
“Без бик җаваплы вакытта җыелдык – безне Россия Президентын сайлау буенча сәяси кампаниядән бары берничә көн аерып тора. Сүз алты ел дәвамында илебезнең стратегия һәм тактика үсешен билгеләүче кеше турында бара”, - дип билгеләп үтте Фәрит Мөхәммәтшин. Ул икътисади өлкәдәге катлаулы бурычлар, социаль проблемалар белән эшли ала торган кешене сайларга кирәклеген билгеләп үтте.
Россия Президентына кандидат итеп сигез кеше теркәлүен искә төшерде. Парламент башлыгы яшьләргә әлеге очракта ориентлашу җиңел булмавын билгеләп үтте. “Яшьләрнең роле, аларның активлыгы, конституцион бурычларын үтәүнең әһәмиятен аңлавы – бик мөһим. Без Татарстан яшьләренең сәяси активлыгын һәм сайлауларда үзләрен уңай яктан күрсәтүләрен телибез”, - диде ул.
"Татар-информ" МА язмасы буенча, Андрей Данилов фотолары
| 
