Экология һәм иҗтимагый киңлекләр елын үткәрүгә йомгак ясады
30 март 2018, 16:40
Бүген Дәүләт Советында “Бердәм Россия” партиясенең Татарстан Республикасындагы депутатлар берләшмәләре республика координация советының гомуми җыелышы булып узды. Чарада катнашучылар узган елда республика программаларын тормышка ашыруга, экология һәм иҗтимагый киңлекләр елын үткәрүгә йомгак ясады.
Утырышта ТР төзелеш, архитектура һәм торак-коммуналь хуҗалык министры урынбасары Илшат Гыймаев 38 республика социаль (президент) программасының ничек тормышка ашырылачагы турында тәфсилләп сйләде. Ул Татарстанда ел саен 2,4 миллион квадрат метрдан артыграк торак мәйданы файдалануга тапшырылуын, республиканың бу күрсәткеч ягыннан лидер-төбәкләр дистәсенә керүен искәртте.
Утырыш ахырында Дәүләт Советы Рәисе урынбасары, “Бердәм Россия”нең парламенттагы фракциясе җитәкчесе Юрий Камалтынов республикада “Законнарны бергә язабыз!” дигән парламент проектының дәвам итүен искә төшерде.
Дәүләт Советы матбугат хезмәте, Андрей Данилов фотолары
|
