Татарстан Республикасы Дәүләт Советы Рәисе Ф.Х.Мөхәммәтшинның Cлавян язуы һәм мәдәнияте көне белән котлавы (2018 елның 24 мае)
23 май 2018, 17:22
Хөрмәтле татарстанлылар! Сезне Славян язуы һәм мәдәнияте көне белән тәбрик итәм.
Бу бәйрәм – бөек мәгърифәтчеләр Кирилл һәм Мефодийны олы ихтирам белән искә алу көне. Унбер гасыр элек алар славян халыкларына борынгы славян телләренең яңгырашын үзенә туплаган, бөтен нечкәлекләрен исәпкә алган үзенчәлекле «кириллица» әлифбасын бүләк итәләр. Шул рәвешле, зур тарихи һәм геосәяси әһәмияткә ия булган көнчыгыш-христиан мәдәниятенең гомуми киңлеген үстерүгә, мәдәни һәм рухи бөтенлегенә нигез салына һәм мәгърифәткә, фәнгә юл ачыла. XXI гасырда яшәүче һәркем өчен бу көн аерым мәгънәгә ия. Ул руслар, болгарлар, серблар, украиннар, белоруслар һәм башка халыклар бердәмлегенең якты символы булып тора һәм православие христиан тәгълиматына, аның югары әхлакый идеалларына нигезләнә торган рухи традицияләрнең уртак булуын искә төшерә.
Татарстан – күп төрле милләт һәм дин вәкилләрен берләштергән республика. Биредә гасырлар дәвамында 170 тән артык халык дус һәм тату гомер кичерә. Милли үзенчәлекләрне, телләрне, гореф-гадәтләрне саклап калу, милли мәгарифне һәм мәдәниятне үстерү өчен барлык шартлар да тудырылган. Шул ук вакытта безнең барыбызны да, төрле милләт һәм дин вәкилләрен, рус теле берләштерә. Мәдәни мирасны үзара баетып һәм тарихи сәхифәләрне истән чыгармыйча, татарстанлылар һәрвакытта да туган илебезнең бөтенлеге һәм милли иминлеге сафында торалар, уртак йортыбызда бердәмлекне, тынычлык һәм татулыкны һәрьяклап ныгыталар.
Кадерле дуслар! Славян язуы һәм мәдәнияте көне җәмгыятьтә үзара аңлашуны ныгытуда тагын бер адым булыр, бер-беребезне яхшырак белергә, Россия Федерациясе халыкларының бай рухи һәм әдәби-сәнгати мирасына мөрәҗәгать итәргә мөмкинлек бирер дип уйлыйм. Сезгә нык сәламәтлек, бәхет, иминлек һәм барлык эшләрегездә уңышлар телим.
|
