Дәүләт Советында шәхси ярдәмче хуҗалыкларга дәүләт ярдәме турында фикерләштеләр
27 июнь 2018, 16:18
Дәүләт Советының Законнарга һәм аларның кулланылышына мониторинг комиссиясе утырышында шәхси ярдәмче хуҗалыкларга дәүләт ярдәме турында республика законын тормышка ашыру һәм фермерларны субсидияләүнең яңа формаларын гамәлгә кертү зарурилыгы мәсьәләләре каралды. Комиссия әгъзалары шәхси ярдәмче хуҗалыкларга ярдәм итүгә бүлеп бирелә торган бюджет средстволарын бирү һәм алардан файдалануга контрольлекне көчәйтү зарури дип исәпли.
Шәхси ярдәмче хуҗалыкларга дәүләт ярдәме турында республика законының Дәүләт Советында 2015 ел азагында кабул ителгәнлеген искә төшерик. Бүген республикада 1200дән артыграк гаилә фермасы һәм 450 мең шәхси ярдәмче хуҗалык, 5 мең чамасы крестьян-фермер хуҗалыгы бар. Шәхси хуҗалыклар ел саен республика авыл хуҗалыгы продукциясенең гомуми күләменнән яртысыннан артыграгын җитештерә. Хәзерге вакытта Татарстанда авылда фермерларга ярдәм итүне күздә тоткан 20дән артыграк республика программасы тормышка ашырылып килә.
Дәүләт Советы Матбугат хезмәте
| 
