Депутатлар Камил Фасиев каберендә булдылар
28 сентябрь 2018, 14:15
ТАССР Югары Советының 80 еллык юбилее елында республикада дәүләт хакимиятенең иң югары закон чыгару органын җитәкләгән һәм парламентариз үсешенә зур өлеш керткән кешеләрнең истәлеген яңартуга бәйле чаралар дәвам итә. Шул исәптән аларның каберләрен төзәтү һәм кабер ташларын яңартуга да зур игътибар бирелә.
Бүген ТР Дәүләт Советы Рәисе урынбасары Татьяна Ларионова, Дәүләт ткорылышы һәм җирле үзидарә комитеты рәисе Альберт Хәбибуллин һәм Икътисад, инвестицияләр һәм эшмәкәрлек комитеты җитәкчесе урынбасары Камил Садриев, парламент аппараты хезмәткәрләре, Самосырово зиратына барып, 1959-1960 елларда республика парламентын җитәкләгән Камил Фасиевның каберенә чәчәкләр бәйләме куйдылар.
"Республикабызда закон чыгару эшен башлап җибәргән һәм парламентаризмны үстерүгә зур өлеш керткән кешеләрне онытмаска тиешбез, аларның якты истәлеген йөрәкләребездә саклап, киләчәк буыннарга тапшырып калдырырга кирәк", - диде Татьяна Ларионова.
Матбугат хезмәте
|
