КПРФ фракцияләре депутатлары журналистлар белән очрашты
05 октябрь 2018, 13:57
4 октябрьдә Дәүләт Советында "Пенсия реформасы, федераль законнардагы үзгәрешләр һәм сәяси вәзгыять турында" дигән темага матбугат конференциясе булды. Республика массакүләм мәгълүмат чаралары вәкилләре белән очрашуда РФ Дәүләт Думасында ТР Дәүләт Советында һәм Казан шәһәр Думасында эшләүче КПРФ фракциясе депутатлары катнашты.
Очрашу башында Дәүләт Советындагы КПРФ фракциясе җитәкчесе Хафиз Миргалимов пенсия реформасы һәм сентябрьдә булып узган региональ сайлаулар аркасында илдәге иҗтимагый-сәяси хәлнең кискенләшүен билгеләп үтте.
Дәүләт Думасы депутаты Юрий Синельщиков журналистларга пенсия реформасы турындагы законга карата КПРФ фракциясенең мөнәсәбәте турында сөйләде. Аның әйтүенчә, әлеге закон кешеләрнең тормыш дәрәҗәсенә һәм иминлегенә тискәре йогынты ясаячак. Парламентарий шулай ук кайбер регионнарда губернатор сайлау йомгакларына анализ ясады һәм илдәге сәяси хәлгә бәя бирде.
Коммунистларның республика парламентындагы эше турындагы сорауларга җавап итеп, Дәүләт Советының КПРФ фракциясе җитәкчесе Хафиз Миргалимов 2019 елгы республика бюджеты турындагы законга тәкъдимнәр турында сөйләде.
Матбугат үзәге
| 
