Дәүләт Советының яңалыклары

Татарстан Республикасы Дәүләт Советы Рәисе Ф.Х.Мөхәммәтшинның 2017 елгы Октябрь революциясе көне уңаеннан сәламләве

Бер гасыр элек булган вакыйгаларга карата җәмгыятьтә төрлечә караш яши. Хәзерге фикер каршылыкларына карамастан, 17 елның  октябре, гомумән алганда,   дөньяви тарихка зур йогынты ясады, миллионлаган халыкның язмышын үзгәртте, яшь Советлар иле үсешенә көтелмәгән этәргеч бирде. Ләкин үлчәүнең икенче ягында  традицияләрне җимерү, тамырдан үзгәртеп кору, җәмгыятьтәге каршылык һәм бихисап корбаннар тора. Тарихта шунысы бәхәссез: революция вакыйгаларыннан соң гражданнар һәм конфессияләр  сугышы килә, канлы бәрелешләрдә бер гаепсез кешеләр һәлак була. Монда җиңүчеләр дә, җиңелүчеләр дә булмый. Күпкатламлы һәм күпмилләтле җәмгыятьтә, ә Россия дәүләте нәкъ шундыйлардан, мондый вәзгыять куркыныч кына түгел, көтелмәгән афәтләргә дә китерергә мөмкин.

Хәзерге вакытта күп кенә ватандашларыбыз өчен 7 ноябрь, элеккечә, яшьлектәге идеалларга һәм киләчәктәге хыялларга бәйле  бәйрәм булып кала. Шуңа күрә, узган гасырның драматик чынбарлыгы турындагы уйларыбызга кире кайтып, без, язмышлары  ХХ гасырның тарихы борылышларына туры килгән өлкән буын вәкилләрен искә алабыз һәм аларга тирән ихтирам хисләрен юллыйбыз.  Ватаныбызның азатлыгы һәм бәйсезлеге өчен алар гомерләрен дә кызганмаганнар, социаль гаделлек һәм алгарыш идеяләрен тормышка ашырганнар, тырыш хезмәтләре белән илебезнең куәтен ныгытканнар.

Кадерле дуслар! Татарстан Республикасы  – төрле милләт, дин һәм  традиция кешеләре өчен уртак йорт.  Безнең барыбызны да туган илгә мәхәббәт, тыныч һәм имин тормышта яшәү теләге берләштерә. Иманым камил, үткәннәрдән сабак алып, Россия Федерациясенең бердәмлеген саклап, намуслы хезмәтебез белән без алга киткән дәүләттә яшәрбез, куелган максатларыбызга ирешербез, Ватаныбызның данын сакларбыз һәм тагын да арттырырбыз.

Сезгә нык сәламәтлек, иминлек һәм туган Татарстаныбыз, куәтле Россия хакына  барлык эшләрдә дә уңышлар телим!