Фәрит Мөхәммәтшин Уфа нефть университетын юбилей белән котлады
30 ноябрь 2018, 17:25
Бүген Дәүләт Советы Рәисе Фәрит Мөхәммәтшин Уфада эш сәфәрендә булды. Ул Уфа дәүләт нефть техник университетына 70 ел тулу уңаеннан оештырылган тантанада катнашты, Башкортостан Республикасының Дәүләт Җыены - Корылтае Рәисе Константин Толкачев белән очрашты.
Укытучыларны, хезмәткәрләрне, студентларны, ветераннарны һәм әлеге уку йортын тәмәмлап чыкканнарны университетның 70 еллыгы белән котлап, Фәрит Мөхәммәтшин бу югары уку йортынының Татарстанның нефть һәм нефть эшкәртү тармагына югары квалификацияле белгечләр әзерләп бирүенә басым ясады.
"Минем белән бергә бу бәйрәмгә безнең республикада яшәүче һәм хезмәт куючы йөзләгән кеше килергә һәм университетны әлеге юбилей белән котларга, үзләренә белем биргән укытучыларга рәхмәт хисләрен җиткерергә теләр иде, - диде ул. - "Татнефть" җәмгыятендә эшләүче 250 дән артык топ-менеджер нәкъ менә бу уку йотрында "тормышка юллама" алган. Мин дә үземнең биредә укыган булуым белән горурланам. Биредә алган белемнәр, хезмәткә мөнәсәбәт миңа тормышта үз урынымны табарга, уңышларга ирешергә ярдәм итте. Без үзебезнең альма-матерга, укыткан остазларыбызга чиксез рәхмәтле!".
Фәрит Мөхәммәтшин Уфа нефть университеты ректоры Рамил Бахтизинга Татарстан Республикасы Дәүләт Советы Рәисенең югары уку йорты коллективына юлланган Рәхмәт хатын тапшырды.
Уфа дәүләт нефть университеты 1948 елда Губкин исемендәге Мәскәү нефть институты филиалы базасында барлыкка килә. Хәзерге вакытта бу уку йортында 20 мең студент белем ала. 70 ел эчедә университет 100 меңнән артыграк белгеч әзерләгән.
Эш сәфәре барышында Фәрит Мөхәммәтшин Башкортостан Республикасының Дәүләт Җыены - Корылтае Рәисе Константин Толкачев белән очрашты. Парламент вәкилләре законнар чыгаруда һәм РФ Дәүләт Думасына, Федерация Советына федераль закон проектлары әзерләгәндә һәм керткәндә бергәләп эшләү хакында сөйләштеләр.
Әңгәмәдәшләр ике республика парламентларын күпъеллык хезмәттәшлек бәйләп торуын әйтеп, киләчәктә узара мөнәсәбәтләрне тагын да ныгытырга дип сөйләштеләр. Шулай ук Татарстан белән Башкортостанның башкарма хакимияләре, муниципалитлары, предприятияләре һәм иҗтимагый оешмалары хезмәттәшлек итә. Икътисад, мәдәният, мәгариф, сәламәтлек саклау һәм башка өлкәләрдә дә элемтәләр урнаштырылган.
Дәүләт Советы матбугат хезмәте, Башкортостан Корылтае матбугат үзәге мәгълүматына таянып
| 
