Дәүләт Советының яңалыклары

Вакыйга турында фото

Рафис Борһанов: "2022 елда нәниләрнең барысы да балалар бакчаларына йөрү мөмкинлегенә ия булачак"

Министр әйтүенчә, узган ел мәгариф тармагын үстерү ягыннан бик тә мөһим булган.  "Мәгариф" илкүләм проектының төбәккә кагылышлы өлешләре эшләнгән.

2024 елга кадәр Россиянең гомуммәгариф  сыйфаты буенча дөнья күләмендә беренче унлыкка керүен тәэмин итү максатыннан, мәгариф тармагын эчке һәм тышкы яктан сыйфатын күтәрү бурычы куелган. Бу укытуны, тәрбияне,  кадрлар әзерләүне -  һәм башка бик күп юнәлешләрне үз эченә ала.

Татарстан Республикасында  ике меңнән артык мәктәпкәчә  белем бирү оешмасы эшли.  Өч меңнән артык бала шәхси бакчаларда тәрбияләнә. Узган елда республика бюджетыннан бу мәгариф оешмаларына  субсидия рәвешендә 110 миллионнан артыграк акча бирелгән.

2018 елда 800 урынга исәпләнгән 7 балалар бакчасы төзелгән. Шуңа да карамастан, балалар бакчаларына булган ихтыяҗ саклана. Министр әйтүенчә, 2019 елда төзелеш эшләренең артуы көтелә. Быел бер бакча төзеп тапшырылган инде, 29 бакча төзелеп ята.  Алар тапшырылган очракта 6 меңләп бала бакчалы булачак. Төзелеш эшләре алдагы елларда дә дәвам итеп,  2022 елда нәниләрнең  барысы да балалар бакчаларына йөрү мөмкинлегенә ия булачак.

2018 елда 5,5 мең урынга исәпләнгән 10 мәктәп ачылган. "Хәзерге вакытта  җиде мәктәп һәм өч янкорма төзелеп ята.  Бу объектларны ачу өстәмә 9 мең урын  булдыру мөмкинлеге бирә", - диде Рафис Борһанов.

Мәктәп автобуслары паркы да шактый яңартылган. Соңгы өч елда  225 яңа автобус һәм 45 җиңел машина бирелгән.

 - "Заманча мәктәп" төбәк проектын тормышка ашыру укыту - тәрбия эшендә яңа методлар, технологияләр  кертү мөмкинлеген бирә, балаларның уку теләген үстерә, - диде министр. 2024 елга кадәр авыл җирләрендә һәм зур булмаган шәһәрләрдә урнашкан 500 гомумбелем бирү мәктәбенең матди-техник базасы яңартылачак.

Нәтиҗәдә, уку-укыту сыйфаты арткан дияргә җирлек бар. 2018 ел  йомгаклау   аттестациясе нәтиҗәләре шуны күрсәтә, уртача балл 14 мөмкинлектән 11 булган.  Чыгарылыш укучылары арасында 100 балл алучылар саны да арта.

- Бу, нигездә, югары мотивацияле балалар белән максатчан эшләү нәтиҗәсе, - диде министр.   Республикада талантлы балалар өчен интернат тибында 15 махсус мәктәп оештырылган, Республика олимпиада  үзәге олимпиадалар хәрәкәтен координацияләү үзәге булып тора.

Төп бурычларның берсе - һәр укучының мәктәптә үзен иркен, рәхәт хис итүе.  Сәламәтлекләре чикле балалар укый торган 54 оешмада матди-техник база яңартылачак.  Дистанцион программа буенча уку өчен шартлар тудырылачак.

- Республикада туган телләрне өйрәнүнең һәм туган телләрдә укытуның тулы бер системасын тотрыклы саклау, ана телендә белем алу һәм ана телен өйрәнү өчен шартлар тудыру, республикадан читтә яшәүче милләттәшләребезгә телебезне өйрәнүдә ярдәм күрсәтү – өстенлекле эш юнәлешләренең берсе, - диде ул.

Хәзерге вакытта республиканың мәгариф оешмаларында белем бирү 5 телдә алып барыла, 7 тел фән буларак укытыла. Якшәмбе мәктәпләрендә 23 милләтнең телләре һәм мәдәниятләре өйрәтелә.

Аларның эшчәнлеге дәреслекләр һәм уку әсбаплары белән тулаем тәэмин ителә.

Рафис Борһанов әйтүенчә, ТР Президентының юлламасын тормышка ашыру һәм татар телен өйрәтүнең норматив базаны ныгыту, методикаларын һәм технологияләрен камилләштерү максатыннан «Татарстан Республикасының дәүләт теле – татар теле» үрнәк төп белем бирү программасы эшләнеп Федераль реестрга кертелгән.

Татар теле һәм татар әдәбиятыннан 1-9 сыйныфлар өчен үрнәк программаларның проектлары экспертиза процедурасын узган. 10-11 сыйныфлар өчен программаларның проектлары экспертизага тапшырылган.

Үрнәк программалар нигезендә авторлар төркемнәре тарафыннан яңа буын укыту-методик комплектларын әзерләү башланган.

Бүгенге көндә татар теле һәм әдәбиятыннан 89 дәреслек федераль исемлеккә кертелгән. 24 УМК уку әсбабы рәвешендә кулланыла.

Республика халыклары телләрен саклау һәм үстерү максатыннан татар һәм рус телләреннән халыкара олимпиадалар, туган телләрдән республика олимпиадалары, мәктәп театрлары һәм якшәмбе мәктәпләре фестивальләре, тикшеренү эшләре бәйгеләре,  форум һәм семинарлар уздыру дәвам итә.

Рафис Борһанов республикабызда узучы «Тотальный диктант» һәм «Татарча диктант» акцияләре мәгариф системасында зур урын алуын әйтте.

- Укыту технологияләрен камилләштерү максатыннан сәнгать-анимация басмалары, татар телендә мультфильмнар, кыска метражлы кинофильмнар эшләнде,  «Бала» электрон мультимедиа китапханәсе уку-укыту өлкәсендә кулланылыш тапты, - диде ул, -«Татар иле» сайтының форматы тулаем яңартылды һәм мәктәп программасы кысаларындагы текстлар, аудио- һәм видеоматериаллар белән баетылды".

Татар телен, татар халкының мәдәниятен өйрәнергә теләүчеләр өчен «Ана теле» онлайн мәктәбе эшчәнлеге киңәйтелгән.

Рафис Борһанов  үз чыгышында һөнәри белем бирү мәсьәләсенә тукталып, бу нисбәттән Россиянең «Ворлдскиллс» хәрәкәтенә катнашуын уңай бәяләде.

Безнең  республика бу ярышларда алдагылар рәтендә бара. Узган елда Сахалинда  узган Милли чемпионатта Татарстан командасы, Мәскәү командасыннан гына калышып, икенче урынны яулаган.

- Билгеле булганча, 2019 елда бездә зур вакыйга - VII «Ворлдскиллс»  Милли чемпионатының финалы һәм  һәнәри осталык буенча 45 нче дөнья чемпионаты узачак. Бу ярышларга яшьләребезне әзерләү эшләре җитди рәвештә оештырылган.

Татарстан Республикасы – югары белем бирү үзәге, 46 югары уку йортында 150  меңләп студент белем ала.

- ТР Президентының Дәүләт Советы Юлламасында милли мәгариф тармагын камилләштерү, Милли педагогика институтын оештыру бурчы куелды, - диде Рафис Тимерхан улы. - Узган ел Казан федераль университеты структурасында Габдулла Тукай исемендәге Милли мәдәният югары мәктәбе оештырылды. Биредә махсус  эшләнгән мәгариф программасы буенча  125 студент белем ала. Бу максаттан республика бюджетыннан 11,5 млн. сум акча бүленгән. Милли педагогика институтын үстерү эше дәвам итә.

Дәүләт Советы матбугат хезмәте, Андрей Данилов фотолары