КПРФ фракциясе депутатлары журналистларга бишенче чакырылыш Дәүләт Советында эшл йомгаклары турында сөйләделәр
10 июль 2019, 13:26
Бүген Дәүләт Советындагы КПРФ фракциясе республика мәгълүмат чаралары вәкилләре өчен матбугат конференциясе уздырды. Коммунист-депутатларның соңгы биш елда башкарган эшләренә багышланган очрашуда фракция җитәкчесе Хафиз Миргалимов, депутатлар Артем Прокофьев һәм Александр Комисаров катнаштылар.
Очрашу башында Хафиз Миргалимов бишенче чакырылыш Дәүләт Советында КПРФ фракциясенең 2014-2019 еллардагы эшчәнлеге турында мәгълүмат бирде. Шул дәвердә фракция 60 утырыш, 7 семинар-киңәшмә, 12 түгәрәк өстәл, 4 фәнни-гамәли конференция һәм 51 матбугат конференциясе уздырган. Фракция әгъзалары тарафыннан 24 закон проекты парламент каравына кертелгән. Коммунист-депутатларның төп эш юнәлешләре итеп Хафиз Миргалимов пенсия реформасын һәм Казанның генералъ планын, калдыкларны чыгару рфеормасын һәм коррупцияне, бакчачылар һәм йөк ташучылар проблемаларын, экология һәм ТКХ мәсъәләләрен атады.
Конкрет эшләр һәм сайлаучыларның проблемаларын чишү мисаллары турында сөйләгәндә, Хафиз Миргалимов фракциянең һәрвакыт республика җитәкчелеге ярдәменә таянуын билгеләп үтте. "Безне Президент та, Дәүләт Советы җитәкчелеге дә, хөкүмәт тә ишетәләр, сүзебезгә колак салалар, - диде ул. - Барысы да республика һәм аның халкы өчен эшләвебезне аңлый. Шундый үзара аңлашу нәтиҗәсендә безнең инициативалар хуплана: авыл клублары һәм мәктәпләр төзү һәм ремонтлауга, музейлар һәм һәйкәлләрне төзекләндерүгә, бакчачылар һәм офтальмология үзәге проблемаларын чишүгә өстәмә акча бирелә".
Депутат Артем Прокофьев үз чыгышында бишенче чакырылыш парламентның эше ил тарихында гаять авыр һәм катлаулы чорга туры килүен ассызыклады. "Соңгы 5-6 ел буена халыкның тормыш дәрәҗәсе төшә бару нәтиҗәсендә закон чыгаручылар алдында проблемалар артып тора, - диде ул. - Ләкин шуңа да карамастан, безнең фракция беркайчан да, азсанлы булуга сылтанып, кешеләрнең мәнфәгатьләрен яклаудан туктамады, нәтиҗәле эшләде. Җәмгыятьнең барлык проблемалары - барыбызның да уртак проблемалары бит, һәм аларны бергәләшеп чишәргә кирәк".
Депутат Александр Комисаров журналистларга хәбәр иткәнчә, Татарстан парламентының КПРФ фракциясе эшенә партиянең үзәк органнары да зур бәя биргән. Аның әйтүенчә, КПРФ Үзәк комитеты республика коммунист-депутатларының эш тәҗрибәсен башка регионнарның парламент фракцияләренә дә өйрәнергә һәм кулланырга тәкъдим иткән.
Аннары матбугат конференциясендә катнашучылар журналистларның сорауларына җавап бирделәр. Аерым алганда, киләсе чакырылышта фракциянең перспектив эш юнәлешләре турындагы сорауга җавап биреп, Хафиз Миргалимов сугыш балалары турындагы закон проектын, банкрот банкларда акчалары янган кешеләрнең проблемаларын, авыл хуҗалыгына ярдәмне, бердәм дәүләт имтиханнарын бетерүне һәм башка бурычларны атады.
Ә киләсе чакырылышта парламентта коммунистлар саны артачагына ышанычын КПРФ фракциясе җитәкчесе сайлаучыларның теләктәшлеге үсү белән аңлатты. "Шәһәрләрдә һәм районнарда безнең тарафдарлар саны артты, - диде ул. - Узган елда партиягә өч йөзгә якын кеше кабул ителде. Без Татарстанда пионер һәм комсомол оешмаларын яңадан оештырдык. Гражданнар безнең конкрет эшләрне күреп торалар. Шуңа күрә шикләнмичә әйтә алам, парламенттагы мандатлар саны - ул бит Президент бүләге яисә кемнәндер премия түгел, ә позициябезнең дөреслегенә ышану нәтиҗәсе һәм халыкның эшебезгә биргән бәясе".
Матбугат хезмәте
|