Алтынчы чакырылыш Дәүләт Советының беренче утырышы 20 сентябрьдә була
13 сентябрь 2019, 17:09
Алтынчы чакырылыш Дәүләт Советының беренче утырышы 20 сентябрьдә булачак. Бүген Дәүләт Советы Президиумы утырышында шундый карар кабул ителде. Шулай ук утырышта ТР Үзәк сайлау комиссиясенең узган сайлаулар нәтиҗәсе турындагы мәгълүматы тыңланды һәм башка оештыру мәсьәләләре каралды.
Президиум утырышын ачып, Дәүләт Советы Рәисе Фәрит Мөхәммәшин 2019 елның 8 сентябрендә узган парламент сайлауларында катнашкан барлык кешеләргә рәхмәт белдерде. "Тулаем алганда, Дәүләт Советына сайлаулар уңышлы узды, анда сайлаучылар да, партияләр дә актив булды, - диде ул. - Үзәк сайлау комиссиясе 7 партиянең вәкилләрен теркәгән иде. Сайлауларның нәтиҗәләре халыкның республика үсешен яклавы турында сөйли. Киләчәктә Татарстан халкы сайлау барышында белдергән мәсьәләләрне хәл итү буенча зур эшләр көтә безне. "Минем депутатым" дигән сервиска гына да кешеләрдән 8,5 меңләп мөрәҗәгать керде. Алтынчы чакырылыш парламенты республиканың алдынгы рәтләрдә булуы хакына эшләр дип ышанам".
Алтынчы чакырылыш Дәүләт Советына депутатлар сайлаулар нәтиҗәләре турында мәгълүматны ТР Үзәк сайлау комиссиясе Рәисе Мидхәт Шаһиәхмәтов бирде.
Аның әйтүенчә, республикада, Үзәк сайлау комиссиясеннән тыш, 65 территориаль, 2800 участок сайлау комиссиясе эшләгән. "Мобиль сайлаучы" проекты кысаларында 65 гариза кабул итү пункты оештырылган. Әлеге сервис белән 32 меңнән артык сайлаучы файдаланган. Тавыш бирүнең барышын 28 меңләп күзәтүче күзәткән. Удмуртиядән, Марий Элдән, Чувашстаннан, Ульян һәм Киров өлкәләреннән аеруча күп күзәтүче булган.
Тавыш бирү нәтиҗәсендә партия исемлекләре буенча мандатлар "Бердәм Россиягә" (44 мандат) һәм КПРФка (6 мандат) бирелде. Бер мандатлы округларда 41 урынны "Бердәм Россия", 6 урынны үзен тәкъдим итүчеләр һәм берәр урынны ЛДПР, "Справедливая Россия", "Партия Роста" вәкилләре алды.
Президиум ТР Үзәк сайлау комиссиясе рәисеМ.Р. Шаһихмәтовның алтынчы чакырылыш Дәүләт Советына сайлауларның нәтиҗәләре буенча мәгълүматын игътибарга алды.
Дәүләт Советы Секретаре Лилия Маврина тәкъдиме белән Президиум алтынчы чакырылыш Дәүләт Советының беренче утырышын уздыру көнен һәм анда каралачак сорауларны карады.
"Дәүләт Советы Регламентының 39 статьясы нигезендә яңа чакырылыш Дәүләт Советының беренче утырышын алдагы чакырылыш Дәүләт Советы Президиумы билгели, - дип искә төшерде ул. - Беренче утырышка чыгарылган сорауларны алдан карар өчен бишенче чакырылыш Дәүләт Советы Президиумы депутатлар вәкилләре киңәшмәсен җыя. Вәкилләр җыелышына вәкилләр өч депутаттан бер кеше исәбенән территориаль җыелышларда сайлана".
Лилия Маврина тәкъдиме белән Президиум алтынчы чакырылыш Дәүләт Советы депутатлары вәкилләре киңәшмәсен 18 сентябрьдә сәгать 10да парламентның кече залында уздыру турында карар кабул итте.
Президиум карары белән, алтынчы чакырылыш Дәүләт Советының беренче утырышы 2019 елның 20 сентябрендә сәгать 10да булачак.
Беренче утырышта оештыру мәсьәләләре, шул исәптән Дәүләт Советы Рәисен, аның урынбасарларын, Дәүләт Советы Секретарен, Президиумын, сайлау турында каралачак. Дәүләт Советы комитетлары, комиссияләре һәм ТР Дәүләт Советының РФ Федерация Советындагы вәкиле билгеләнәчәк.
Беренче утырышта каралачак сорауларның әһәмиятен һәм сайлаучыларның зур кызыксынуын исәпкә алып, Дәүләт Советы утырышы барышын телевидение һәм радио аша турыдан-туры трансляцияләү турында карар кабул ителде.
Президиум утырышында Дәүләт Советының беренче утырышына чакырылган затлар турында карар кабул ителде. Алар арасында ҮИКның бөтен әгъзасы (11 кеше) һәм сайлауда катнашкан партияләр вәкилләре дә бар.
Утырышта башка сораулар да каралды.
Дәүләт Советы матбугат хезмәте
| 
